У аддзяленні дзённага знаходжання інвалідаў і людзей пажылога ўзросту тэрытарыяльнага цэнтра сацыяльнага абслугоўвання насельніцтва прайшоў шэраг мерапрыемстваў, прымеркаваных да Дня жанчын.
Пачаткам святкаванняў стала сустрэча з жанчынамі, праз чый лёс прайшла Вялікая Айчынная вайна. Дзесяць былых вязняў канцэнтрацыйных лагераў і дзяцей вайны сабраліся ў актавай зале аддзялення. На сустрэчу з імі прыйшлі намеснік старшыні райвыканкама Святлана Сенька і дырэктар цэнтра Галіна Сухоцкая.
Праграма мерапрыемства была напоўнена канцэртнымі нумарамі, падрыхтаванымі наведвальнікамі аддзялення, а таксама віншаваннямі. З імі да жанчын звярнулася Святлана Сенька, зычыла здароўя і вясенняй цеплыні ў душы, міру і дабрыні. Да яе пажаданняў далучылася Галіна Сухоцкая, запрасіўшы гасцей стаць актыўнымі наведвальнікамі аддзялення. Напрыканцы ўрачыстай часткі праграмы намеснік старшыні райвыканкама ўручыла жанчынам кветкі і падарункі. Сустрэча мела працяг у чаяпіцці і салодкіх частаваннях.
На наступны дзень аддзяленне дзённага знаходжання ўшаноўвала жанчын, што з’яўляюцца яго наведвальнікамі. Насычаную канцэртную праграму прадставілі самі віноўнікі свята.