У Беларусі сёння адзначаюць Дзень сям'і
15 мая, Мінск /Кар. БЕЛТА/. Міжнародны дзень сем'яў адзначаецца штогод 15 мая ў адпаведнасці з рэзалюцыяй Генеральнай асамблеі ААН. У Беларусі ў гэты дзень таксама адзначаюць рэспубліканскае свята - Дзень сям'і. У гэтым годзе свята праходзіць пад дэвізам "Мая сям'я - мая краіна".
Моцная сям'я - аснова развіцця дзяржавы. Паводле даных перапісу насельніцтва 2019 года, у Беларусі налічвалася 2 612 413 сем'яў. У 2022 годзе ў краіне быў узяты 57 901 шлюб.
У рэспубліцы паступова павялічваецца колькасць шматдзетных сем'яў. Цяпер у краіне налічваецца больш як 121 тыс. шматдзетных сем'яў.
Дзяржава захоўвае свае сацыяльныя абавязацельствы па падтрымцы сем'яў з дзецьмі. У краіне забяспечаны рост памераў дапамог па доглядзе дзяцей, уведзены дадатковыя віды матэрыяльнай падтрымкі сем'яў, прадастаўляецца шырокі спектр сацыяльных паслуг. У 2023 годзе на сістэму дзяржаўных дапамог выдзелена Br3,5 млрд, з іх Br2 млрд - толькі на выплату дапамог па доглядзе дзіцяці ва ўзросце да 3 гадоў. Выплатамі забяспечаны амаль 400 тыс. дзяцей (кожнае 4-е дзіця ў краіне), з іх 220 тыс. - дзеці да трох гадоў.
У Беларусі колькасць усыноўленых дзяцей за 2022 год павялічылася на 17 працэнтаў у параўнанні з 2021 годам. На сённяшні дзень у сем'ях усынавіцеляў пражывае 7385 дзяцей, функцыянуе 309 дзіцячых дамоў сямейнага тыпу, дзе выхоўваюцца 1828 дзяцей, 1505 прыёмных сем'яў, якія выхоўваюць 2661 дзіця. Па выніках 2022 года на сямейную форму ўладкавання перададзена ў два разы больш дзяцей з інваліднасцю, чым у папярэднім годзе. Сёння на выхаванні ў сем'ях знаходзяцца 12 387 такіх дзяцей. У цэлым удзельная вага дзяцей-сірот, якія выхоўваюцца менавіта ў сем'ях, дастаткова высокая і складае 88,6 працэнта.
Адной з самых значных мер па падтрымцы сем'яў пры нараджэнні трэціх і наступных дзяцей у Беларусі з'яўляецца сямейны капітал - аднаразовае прадастаўленне безнаяўных грашовых сродкаў з 1 студзеня па 31 снежня 2023 года складае Br29 950. На 1 мая 2023 года ў аддзяленнях Беларусбанка адкрыта 125 933 дэпазітныя рахункі сямейнага капіталу, на якія залічана Br1,876 млрд. Акрамя таго, штогод шматдзетным сем'ям аказваецца аднаразовая матэрыяльная дапамога да пачатку навучальнага года.
Работа па ўзмацненні сацыяльна-эканамічных стымулаў вядзецца паралельна з дзейнасцю па павышэнні прэстыжу інстытута сям'і, умацаванні сямейных каштоўнасцей. У гэтых мэтах праводзіцца шэраг мерапрыемстваў, у тым ліку конкурсы "Лепшая шматдзетная сям'я", "Сям'я года".
У бягучым пяцігоддзі сямейная палітыка накіравана на папулярызацыю ў грамадстве духоўна-маральных каштоўнасцей інстытута сям'і, удасканаленне сістэмы падрыхтоўкі моладзі да сямейнага жыцця. Гэта прадугледжана дзяржпраграмай "Здароўе народа і дэмаграфічная бяспека" на 2021-2025 гады.
У Беларусі пройдуць прымеркаваныя да святкавання Дня сям'і разнастайныя мерапрыемствы: прэс-канферэнцыі, форумы, круглыя сталы, акцыі, а таксама культурна-масавыя і фізкультурна-аздараўленчыя мерапрыемствы. Акрамя таго, 15 мая ва ўсіх установах агульнай сярэдняй адукацыі пройдзе адзіны ўрок "Лёс маёй сям'і ў гісторыі краіны". У абласных, гарадскіх, раённых выканаўчых камітэтах пройдуць урачыстыя прыёмы па ўзнагароджанні ордэнам Маці шматдзетных маці.