У нядзелю, 12 сакавіка, споўнілася 35 гадоў з дня нараджэння нашай
зямлячкі, адной з самых тытулаваных спартсменак Беларусі Марыны
Літвінчук, у дзявоцтве – Паўтаран.
Пералічыць усе дасягненні нашай вясляркі на байдарцы не хопіць, пэўна, і
старонкі нашай газеты. Калі гаварыць сціслай мовай фактаў – Марына
Літвінчук з’яўляецца срэбранай і 2-разовай бронзавай прызёркай
Алімпійскіх гульняў, 6-разовай чэмпіёнкай свету і 7-разовай чэмпіёнкай
Еўропы. Акрамя гэтага, Марына Віктараўна шмат разоў святкавала перамогу
на міжнародных студэнцкіх спаборніцтвах, універсіядах, Еўрапейкіх
гульнях і, вядома, нацыянальных турнірах. Колькасць медалёў жанчыны
налічвае звыш дзвюх соцень.